اول مرة اعمل مراجعة ط، لكن الحقيقة الراوية جميلة لكاتب اول مرة اسمع عنة،
فيها مميزات وعيوب وهحاول اكون حيادى.
أنا دلوقتى هتكلم كنقد بناء لتطوير نفسك بشكل فعال و للزيادة من المميزات فى المستقبل إن شاء الله و لتصحيح العيوب أيضا فى المستقبل إن شاء الله. و ليس للتقليل طبعا لا سمح الله من مجهودك مثل ما يفعل البعض من أعداء النجاح.
### المميزات و العيوب ل نجمة كاترين:
--- الإهداء رائع فى مقدمة الكتاب. سواء للوالدين أو أحدهما أو سواء للناس عموما...
--- طبعا الله يرحمها والدتك و كذلك والدك الله يرحمه. و أتمنى أنهم يكونوا شافوا نجاحك ده قبل الوفاة لأن أنا مش عارف إنت كاتب الإهداء ده قبل الوفاة ولا بعد الوفاة.
--- فكرة إنك تستفاد من خبراتك السابقة عن رحلتك لسانت كاترين و كذلك رحلتك لفرنسا و تعملها رواية. و تربط الأحداث ببعض. ده كان حلو جداااااا
---- فكرة إنك تنصح الناس بزيارة سانت كاترين و كذلك زيارة أماكن جديدة عموما. كانت فكرة رائعة.
--- السخرية من دكتورة سارة. أنا عارف إن مجدى متغاظ منها. و عارف كمان إنك بتهزر بلفظ الضفدعة و ذكر الضفدع و مدام ضفدع و كده و على مساحيق التجميل التى تصبح مساحيق التوحيش و أنا شخصيا مش بتقبل أى بنت أو أى ست بمكياج أبدأ و نفس الكلام الست المتسلطة بتكون مش مقبولة على الإطلاق و لكن فيه فرق ما بين الرأى الشخصى و ما بين أنى هكتب رواية و هنشر فكر و ثقافة للأجيال المختلفة و للقارىء عموما. و بالتالي لا يسخر رجل من رجل أو إمرأة من إمرأة أو رجل من إمرأة أو إمرأة من رجل أو قوم من قوم و الخ الخ من تعاليم الإسلام و أخلاقيات الإسلام و أيضا الرقى و التحضر و مبدأ إحترام الآخرين. مع إحترام حرية الفكر و الإبداع ولكن بدون أخطاء تتمسك عليك.
--- الفكرة جيدة لتحفيز الناس. ولو أنه قد تم تناولها خمس مرات اللى أنا أعرفهم فقط. و غالبا تم تناولها فى أعمال أخرى أنا مش عارفها لأنى بالتأكيد مشفتش كل الأفلام و لم أتمكن أيضا من قراءة كل الكتب و الروايات. أنت عارف ده بحر من المعرفة
--- طريقة التحفيز بتاعة الرواية انا دايما بقولها للناس فى ال Training لما بدخل لهم و لكن و كما يقولون أسهل الأمور أن تعظ الناس و أصعبها أن تعظ نفسك. طبيب يداوى الناس وهو عليل. و باب النجار مخلع.
--- أرفع لك القبعة تقديرا و إعجابا و إحترامااااا لفكرة ربط مدينة سانت كاترين بالبنت اللى إسمها نجمة بإختيار إسم الرواية نجمة كاترين. إختيار موفق جدا و إختيار مميز جدا جدا جدا. تحياتى و تقديرى. عجبتنى الحتة دى اووووووووووى. حلووووة اوى. 🌹🌹🌹
--- طريقة الرواية خلتني أعيش فى الخيال فعلا و ال رومانسية فعلااااا و أتخيل مجدى و حياته اليومية فى بيته وهو محبط و بعدها حياته اللى بقت جميلة اوووى و بيت نجمة و والدها سيادة اللواء. و كذلك لما عاشوا هما الاتنين فى سانت كاترين و شرم و أكلوا مع بعض و حضنوا بعض كذا مرة و كده. سواء لما سافرت شرم و رجعت له تانى او لما رجعت من فرنسا. و لما تم بناء البيت و ادتتته بوسة. لدرجة أنى كان نفسى أكون أنا اللى مع نجمة... و خلتني أنا اللى كان نفسى أنا اللى أحضن نجمة ، و هذا مخالف للدين الإسلامى و مع ذلك فلقد نجحت ك كاتب للرواية أن تجعلنى أشعر بهذا الإحساس و بهذه المشاعر تجاه نجمة فا دى كانت عبقرية منك فى الكتابة فعلا... مش عارف لانى شخصيتى خيالية و رومانسية. ولا انت اللى عملت فيا كده ك كاتب للرواية بمعنى أن ممكن قاريء آخر تكون مشاعره قوية كالصخر ولا يتأثر بهذه المشاعر. ولكن بشكل عام كانت حلوة جدااااااااااااااا الحتة دى فى الرواية. رائعة. أكثرررر من رائعة.
--- طريقة نجمة و أصحابها فى كافيه الزمالك. كانت روعة و خصوصا كلامهم عن مجدى و تريقتهم على صاحبتهم نجمة عشان إعجابها بمجدى و كده. كانت طريقتك حلوة أوى. و نفس الكلام لما نجمة بتقول لمجدي تاكسي يا أستاذ فى ثانى مرة و ذلك بعد رفضه أول مرة.
--- عنصر التشويق بأنى طول الوقت منتظر أشوف إيه اللى هيحصل كقارىء . ده كان حلو جدااااااا و مطلوب فى كتابة الروايات طبعا.
--- طريقة وصف فرنسا و صديقة نجمة و زوجها و الحى الفرنسي و طبيعة الحياة و العلاقة فى فرنسا كانت حلوة.
--- مش عارف لفافة التبغ اللى إستلمتها نجمة فى فرنسا عشان تديها لأبوها. ده ليه علاقة برواية لفائف التبغ كعنوان للرواية ام أنه من قبيل الصدفة خصوصا أننى لم أقرأ سوى نجمة كاترين فقط حتى الآن---
--- ذكر الآيات القرآنية فى بداية الرواية كان حلو جدا بس كنت عايزك تجمع من قاريء للقرآن الكريم أو شيخ متخصص. كنت تجمع كل الآيات القرآنية التى تحث على أننا نذهب لأماكن جديدة بمبدأ الرزق أو النجاح أو الخروج من المحنة النفسية. زى الآيات اللى أنت ذكرتها. و زى برضو و أمشوا فى مناكبها سعيا طبعا من أجل الرزق و غيرها و غيرها من الآيات بحيث يكون عندنا فى الرواية كذا آية قرانية لنفس المعانى. و ذلك من أجل ترسيخ الفكرة و المبدأ نفسه من خلال أكثر من آية و أكثر من دليل تم ذكره فى كتاب الله و فى آيات القرآن الكريم.
--- فكرة إقامة مجدى فى منزل واحد مع نجمة فى شرم الشيخ كانت غير مقبولة على الإطلاق. و ذلك بمبدأ نشر تعاليم الدين الإسلامى الصحيحة و ليس نشر الفكر الغربى المتحرر.
و فى نفس الوقت قالت له بمجرد إنتهاء بناء المنزل الخاص بك سوف أعوووووود على الفور. فكل هذه الأشياء متناقضة مع بعضها البعض. بس أنا ك قاريء هقول هيا مؤدبة و لا متحررة و لا صايعة و لا بتحب شخص أوووى و لا واثقة فيه و لا معندهاش دين إسلامي. و فى نهاية الرواية أكتشفنا السبب.
--- طريقة الإيحاءات الجنسية لجسد نجمة و نهديها و قطفها الذى لم يحين بعد. بس خد بالك قد يقبلها بعض القراء للرواية و قد يرفضها البعض. خلى بالك من النقطة دى كويس لتجنب الإنتقاد طبعا. و أيضا ده كان مخالف تماما لطبيعة شخصية مجدى المحترمة جدااااا بشكل عام أو عشان حبه و إحترامه ل نجمة بشكل خاص. حتى و إن كان حلم فقط أو العقل الباطن و ما إلى ذلك. يعنى لازم كلام جنسى برضو فى الرواية ؟
--- كلمة أردفت و أردف إتقالت كتيررررر جدا و زهقتنى فى عيشتى فا بلاش تكرار نفس الكلمة كتير أوى كده. إلى جانب التأكد من صحتها لغويا. أنا مش متخصص طبعا.
--- الخلط ما بين اللغة العربية الفصحى الصحيحة و اللغة المصرية القاهرية العامية و اللغة البدوية لسانت كاترين فى طريقة الكتابة. على أد فهمى المتواضع ده غير صحيح أدبيا و لغويا و يرجى التأكد من ذلك عن طريق المتخصصين. ولكن كان أسلوبها حلو لتخيل الأحداث و الأماااااكن أثناء القراءة---
ملحوظة هامة: هناك أخطاء فى الحروف كثيرة جدااااااا و أنا كتبتها و هبعتها لك... وهذا لا يليق بدار النشر و الطباعة خصوصا أن هناك مراجعة لغوية بتاعة الأستاذة فاطمة. طبعا ده مش ذنبك انت. ده ذنبهم همااااا و لكنها تسيء لك ك كاتب و للرواية. و هذا غير مقبول و يجب الانتباه للامر.
--- أكيد يوجد شخصيات حقيقية انت شفتها فى حياتك هيا اللى فى الرواية و يوجد شخصيات خيالية طبعا.
--- أنا طبعا مش عارف دور الاخراج الداخلي الاستاذ مينا. كان ليه علاقة من قريب أو بعيد بالحاجات اللى عجبتنى فى الرواية أم لا. و ذلك لانى لا أعرف طبيعة عمله كإخراج داخلى. و لكن بشكل عام طبعا أنا قلت على كل المميزات و العيوب.
بشكل عام ... الرواية طبعا حلوة جدا جدا جدا. تحياتى و من نجاح إلى نجاح إن شاء الله.
