((سأتظاهر بأن الحياة كلها ليست سوى لعبة على أن ألعبها بمهارة وبإنصاف قدر استطاعتى. وإن خسرت، فسأرفع كتفى وأضحك، وسأفعل ذلك إن ربحت أيضًا.)) كتاب لطيف ممتع رقيق وخفيف جدًا على القلب بالرغم إنه بيحمل مشاعر عميقة جدًا وقوة تحمل كبيرة جدًا على عكس اما كنت أتصور قبل ما أبدأ قراءة فيه. الكتاب يعتبر من أدب الرسايل ومن خلال الرسايل دى ظهرت لنا شخصية جيروشا واللى عانت كتير من صغرها واللى بردو كان بيأثر عليها سلبيات كتير متمثلة فى حاجات كتير من حوليها، بس كانت قادرة تخفف عن نفسها ودا فى حد ذاته شىء عظيم جدًا. نيجى لنقطة مهمة جدًا!! بالنسبة للكتاب دا فهو مناسب جدًا لأشخاص مبتدئين أو أشخاص فى سن صغير بس بردو الكتاب دا ممكن يستفاد منه ناس كتير ودا على حسب القارىء، ففى حد بيشوف الكتاب كونه مفيد أو مهم لو قدامه فكرة أو معلومة واضحة يقدر إنه يستفيد منها أو يطبقها زى كتب التنمية البشرية والذات كدا، وفى قارىء تانى بيحب يستكشف كل نقطة بالمعنى فى الكتاب بحيث إنه يقدر يطلع منها معلومة. أنا شايفة إن الكتاب دا فيه معلومات كتير ولو بسيطة ممكن كتير ميكونش يعرفها أو يعرف معظمها على الأقل، فمثلًا الكتاب فيه أسماء فنانين وكتاب وفيه أعمال أدبية كتير من الممكن إن ناس كتير متكنش تعرفها ولو حد بيحب الاستكشاف دى هتكون حاجة ملهمة جدًا لزيادة ثقافته. وكمان حاجة مهمة تانية إنه بيوضح لنا قوة التحمل والإرادة فبجد الكتاب دا كان حاجة مختلفة ولطيفة على القلب جدًاا من كل ناحية، مع كل رسالة جيروشا كانت بتكتبها، مع كل رسمة توضيحية لطيفة ومع كل توقيع لها لصاحب الظل الطويل.