رأيي في كتاب "استيجما". بدايةً حابب أحيّي الدكتور محمد فؤاد على فكرة الكتاب، واللي أكاد أجزم أنه سيتم ترجمته إلى اللغة الإنجليزية وبعدها باقي اللغات بإذن الله.👏 بدأت في قراءة الكتاب أول ما جبته، وكنت هخلصه في نفس اليوم لولا إني كنت تعبان من اليوم الطويل، بسبب لفّي الكتير في المعرض، فكملت الكتاب اليوم التاني. كتاب "استيجما" باختصار شديد هو عبارة عن حلقات نفسية يقدمها المريض النفسي. هتحس كأن المريض النفسي هو اللي بيتكلم؛ لأن الدكتور محمد فؤاد بيتكلم على لسان المريض نفسه. فالمريض بيبدأ يتكلم عن نفسه واللي بيعاني منه.👀 لكن المؤلف اختار أهم الأمراض النفسية الشائعة واتكلم عنها، ودا اللي خلاني متشوق لجزء ثاني من الكتاب في أسرع وقت. لأن كل واحد فينا ممكن يكون خاض تجربة المرض النفسي قبل كدا، سواء اكتشفه وعالجه أو لاء، وممكن يكون حد من أهلك أو معارفك خاض التجربة دي قدامك. فيصيبك "استيجما" أو وصمة العار اللي على المريض دا، المريض بيحس إنه غريب عن الناس، بيحس إنه عايش في عالم تاني ومحدش حاسس بيه ولا بمعاناته. عشان كدا المؤلف اتكلم بلسان المريض؛ عشان يعرفنا كلنا إيه اللي بيمُرّ بيه المريض. كتاب هيعيّشك في جو من المتعة كأنك بتقرأ رواية والله. رغم أنه كتاب علمي لكن طريقته الأدبية خلتني مستمتع وأنا بقرأه ومركز مع كل كلمة. وقاعد بتوقع اللي جاي هيكون عامل ازاي كأنه مسلسل وقاعدين نتوقع أحداثه.😂 فأنا بطالب الدكتور محمد فؤاد يشوفنا بالجزء الثاني في أقرب وقت عشان مينفعش كدا والله، في أمراض تانية كتير عايزين نتعرّف عليها بنفس الأسلوب الجامد دا.😭🧡