مثلا
مثلا بقلم عمرو حسن ... بتحب ليه السيما! اسأل محمد خان... واسأل صبي حبها واداها روحه، اتخان بتحب ليه الشتا؛ اسأل بقى الدخان واسأل خيوط الصوف في البالطو هتقولك: (لولا الشتا يا صديق كنا اتحرقنا حريق) لولا السجاير والغنا والبُن كنا صبحنا حطام أو صنف من أصنام مصنوعة بالعجوى ولولا - أحمد زكي وسناء جميل - مثلًا كنا صبحنا حديد أو علبة اسطوانات لكن لحزن الحسن والخبطات ربك جعلنا غلابة بالفطرة علشان كده كل اما اجرّب الانتحار بافشل وبتدخلوا الأوضة وانا باقول اكشن فبتحسبوا المشنقة من جهلكوا فيونكة ودي .. مش فيونكة
نبذة عن الكاتب
![عمرو حسن]()
عمرو حسن
مواليد 17/8/87 بحي العصافرة الاسكندرية
متخرج من كلية التجارة بجامعة قناة السويس لعام 2010
وبكتب الشعر من 2004
الجوائز
- جائزة ساقية الصاوي ( أفضل شاعر 2010 )
- جائزة مجلة الثقافة الجديدة ( أفضل شاعر 2010 )
- جائزة المركزية 2008
- ذهبية الجامعات 2009 ( أفضل شاعر )
- درع جامعة حلوان 2009 ( أفضل شاعر )