الرجال من المريخ النساء من الزهرة

مراجعتك

2ونص من خمسة.. ايوة بالظبط كدا والله😂 الكتاب تحفة ما اختلفناش بس تقييمي قل لأسباب كتير هشرحها في السلبيات -الايجابيات: المحتوى عظيم جدا.. المعلومات اللي فيه شاملة وعظيمة وعلمية وفيه معلومات كتير جدا ماعدتش عليا قبل كدا في اي كتاب بالعكس دا اللي عدى عليا كان مقتبس اصلا من الكتاب دا.. وبالذات جزء الحاجات العاطفية والنساء مثل الأمواج الاسلوب حلو برضو.. مش علمي معقد ومش طريقة كتابة عالناصية😂 يعني قصدي مش friendly اوي زي مثلا (why men love bitches) الطريقة decent ومحترمة من غير تعقيدات كتير . السلبيات بقا: مشكلتي مع ٣ حجات ١-الرغي الكتير ونعيد ونزيد في كلام كتير قلناه قبل كدا وتفاصيل كتير وأمثلة كتيييييير لدرجة تخنق يعني ال٤١٢ صفحة دول كانو ممكن يتعملو في ٢٠٠ صفحة مثلا ٢- ان الكتاب دا بجد للمتجوزين بس😂 وماعنديش مشكلة في كدا بس دا كان عكس توقعاتي يعني الكتاب عنوانه الرجال من المريخ والنشاء من الزهرة ومكتوب عليه دليلك لفهم الجنس الاخر مش دليلك لفهم شريك حياتك🤷🏻‍♀️ ف بجد ٩٠٪ من المعلومات مش مفيدة غير للمتجوزين.. مش المرتبطين كمان لا المتجوزين.. ممكن ٧٪ للمرتبطين.. و٢ ٪ تفيد السناجل بقا لما يعرفو حجات عن نفسهم😂 ف انا حسيت اللي هو كلام عظيم جدا بس فين بقا زوجي قرة عيني اللي هطبق عليه الكلام دا؟! ٣- اخر حاجة هي اني حسيت ان الكتاب برضو subjective شوية.. او بمعنى أصح من دماغ راجل بيخاطب النساء بشكل أكبر.. حاسة الكاتب بينقل الكلام من منظوره هو وبيوجهه للستات عشان تطبقو.. طب والرجالة؟ يعني انا حطيت نفسي كدا لو انا راجل بقرأ الكتاب دا.. مفيش tips كتير للرجالة ازاي يتعاملو مع الستات.. موجودة اه بس قليلة جدا وحسيت معظم الكلام موجه اكتر للستات ازاي تفهم الراجل وتتعامل معاه ف حسيت انو مش faire خالص للرجالة.. يعني بقعد اقرا كدا الكلام اللي عن الستات وازاي تفهمها وتتعامل معاها والمشكلات وكدا.. واستنى ألاقي طب لو انا متجوزة ودي المشكلة المفروض جوزي يتعامل معايا ازاي؟ الحلول قليلة جدا ومش مشروحة كويس ومعظمها انا اصلا مش فاكراها طب بلاش تقولو هو.. قولي انا عشان اعرف ايه الطريقة الصح اللي هو يتعامل معايا بيها يمكن افيده😂 الموضوع ماكانش موجود بشكل واضح اوي غير تقريبا في الفصل اللي فيه "النساء مثل الأمواج" دا الفصل الوحيد اللي فهمت فيه ازاي المفروض الراجل يتصرف.. بل ازاي كمان الست تتصرف مع نفسها خاصة اني ماكنتش اعرف اصلا الطبيعة دي اللي عند الست وفادتني شخصيا (هي دي ال٢٪ اللي فادتني بعيدا عن العلاقات)

كتاب رائع لإبراز الفروق بين الجنسين والطرق السليمة للتواصل الصحيح الايجابي👍